Mwana mboka Katembo Ndaleni Julien oyo azali  Moyangeli ya mboka Goma (too Maire)  autaki bongo o mokolo mwa  mitano ya sanza eye tozali (5 mai) kobimisa mbano  ya bopekisi mombongo ya masanga ya makasi na ba sachet lokola whisky ebengami « chief ». Kaka oyo ezali kati ya milangi ya 300 ml mpe likolo nde ekoki kotekisama. Moto nyoso oyo akotosa te , akozua etumbu na ye bo mibeko mikotinda.

Mpo nini azui mbano ena ? Toyebi ‘te bato mingi bazali kobombana sima ya masanga kati ya ba sachet oyo bango moko basali na ndako na lolenge elongobani te . Boko bazali kotia ata alcool  dénaturé , oyo ekotekama na pharmacie  to ndako ya mino  mpo  na kotombola bokasi ya masanga ya makasi . Wana bakosangisa "alcool dénaturé" na  mwa ndambo ya whisky penza mpo epesa nsolo na langi na yango . Masanga ya lolenge oyo  ezali kobebisa  bokolongonu ya bato ebele  pe ata kokumba bango na liwa ,  soki te ekobebisa bameli na yango moto , makanisi kaka  ya kotia mobulu na mboka .  Bato mingi, koleka penza bilenge ,  bakoma komela yango po ezali ntalo moke . Kasi ezali nde liwa penza na mpasi ya nzela mokuse! Tokeba makasi , tolengela nzoto; mpo nyoso oyo tokolia too tokotia kati ya nzoto na biso ekobenda soki bolamu te kaka mabe na bomoyi na biso. Yango penza mosala ya bayangeli ekolo. Basenzele mingi bizaleli  ya bayimboka. Kasi ata balobeli kaka masanga ya ba sachet, tokolikya ‘te ezali kaka ebandeli. Mpo esengeli penza batelemela bomeli masanga ya makasi na makaya ya makasi na bilenge . Bango oyo nde bakomi mikolo oyo baye tokobenga kuluna to babomi penza . Bato mingi oyo bazali koboma bato na butu to kokota koyiba na ndako ya bato , bazali mingi baye basilaki komela makaya ya makasi to lopipi , na  masanga ya makasi wana! Longonya na moyangeli Katembo ! Kasi asuka wana te , alemba te , mpo mosala ezali penza ngomba makasi lokola ebanda kala , pe bato mingi bamesana na bizaleli  bina ya mabe. 

Nzoka tokobosana  'te na mobu 2022, mwana mboka Josué Mufula Jive afundaka Shiva Reddy, nkolo kompani Premidis S.A oyo esalaka  kaka masanga ya makasi te , kasi mpe na fufu ya masangu , , gel hydroalcoolique pe lisusu mayi mabengami na lifalansé  "eau minérale" . Kaka kompani oyo ezali pe na  nkombo na yango  etiama na mabaya minene kati ya Goma . Tii lisusu moyangeli ya Goma ya ntango wana apesa balabala moko nkombo na ye lokola ye atongelaki na polisi ya mboka Goma ndako enene ya misala ya motuya 200.000 $!  Tokobenga yango nini soki kanyaka te ? Soki tii na lelo eleki mbula misato tokoyoka lisusu suka ya likambo ena te , kutu masanga wana ezali kaka kotambola pe kotekama.  Pe Katembo alobi malamu ete apekisi whisky ya milangi ya 300ml te kaka oyo ya sachet, elingi koloba 'te whisky wana nde ezali malamu po na bilenge  to po na bokolongonu ya nzoto ?  Esika nini na mikili ya Eropa bamona bakotekisa masanga ya makasi na balabala lokola mapa?  Nzoka yango nde ekosalema awa kaka na ekolo na biso . Mpo nini ? Mwana Kongo nani akoki akende ata azali na misolo kuna na India kosala kompani lokola ye Shiva Reddy asala nan GOMa ? Nani akopesa ye ndingisa ? Mpo nini bakonzi ya KOngo tii na Kinshasa bandima ete bampaya bazuaka biso lokola banyama? 

 Soki tolobi mbongwana esengli ekota , ebanda na makambo mike mike naino. Moto abongwanaka motema na bizaleli ya mokolo na mokolo .  Tokozela penza ete moyangeli ya sika atalisa bolingo na ye na mboka na bozongisi bonsomi mpo bampaya batosa biso na eleko ebengami Révolution ya AFC/M23  . 

Kasi likambo ya sachet oyo ekotiaka mboka na bosoto kaka te kasi pe na bobebisi , mpo na bileko ebele , mabele pe bilei ya bibwele ,banyama na mbisi. Yango  ezali likambo monene penza. Nde tolobeli yango lisusu. 

   Bopeto ezala kaka na mboka te,  kasi ezala pe kati ya nzoto ya bato na mitema.  Wana bayimboka bakosala mosala malamu pe ekolo ekokenda liboso.

✍🏽leobanem